Հռոմի պապը սիրելի մարդու հետ սեքսից եւ լավ ուտելիքից ստացած հաճույքն «աստվածային» է անվանել

Սիրելի մարդու հետ սեռական ակտից կամ լավ ուտելիքից ստացած հաճույքը «աստվածային» է, հայտարարել է Հռոմի պապ Ֆրանցիսկոսը։ Այս մասին հայտնում է AFP-ն՝ վկայակոչելով պոնտիֆիկոսի արտահայտություններով TerraFutura գիրքը։

«Հաճույքը բխում է անմիջաբար Աստծուց։ Այն ո՛չ կաթոլիկ է, ո՛չ քրիստոնեական, ո՛չ որեւէ այլ բան, այն պարզապես աստվածային է»,- ասել է Ֆրանցիսկոսը։

Պոնտիֆիկոսի խոսքով՝ եկեղեցին միշտ դատապարտել է «անմարդկային, կոպիտ եւ գռեհիկ հաճույքը», բայց միշտ ընդունել է պարզը, մարդկայինն ու բարոյականը։

«Չափազանցված բարոյականությունը», որը մերժում է զգացմունքները, «քրիստոնեական պատվիրանի սխալ մեկնաբանում» է, շեշտել է Հռոմի պապը։ Նրա կարծիքով՝ ուտելիքից հաճույքը ծառայում է նրան, որ մարդն առողջ մնա, իսկ սեքսուալ հաճույքը սերն ավելի գեղեցիկ է դարձնում եւ տեսակի շարունակման երաշխիք ծառայում, փոխանցում է «ՌԻԱ Նովոստի»-ն։