5182 կազմակերպության գործունեության կասեցում արտակարգ դրություն հայտարարելուց մինչև օգոստոսի 30-ը

ՀՀ-ում արտակարգ դրություն հայտարարելուց մինչև օգոստոսի 30-ը ներառյալ կայացվել է 5182 կազմակերպության գործունեության կասեցման որոշում. Yerkir.am-ի հարցմանն ի պատասխան՝ թվեր է տրամադրել փոխվարչապետի գրասենյակը:

Հարցին, թե որքա՞ն է կազմել իրավախախտում կատարած տնտեսվարող սուբյեկտների հանդեպ կիրառված տուգանքների ընդհանուր չափը,փոխվարչապետի գրասենյակից պատասխանել են. «Արտակարգ դրության ժամանակ ֆինանսատնտեսական գործունեության առանձին տեսակների իրականացման սահմանափակումները խախտելու համար մինչև 30.08.2020 թ. ներառյալ կազմվել է 280 արձանագրություն, որից՝ 107-ով կայացվել են վարչական տույժ նշանակելու մասին որոշումներ՝ 11 մլն 300 հազար ՀՀ դրամի չափով»:

Ինչ վերաբերում է վերը նշված որոշմամբ այս պահին կատարված վճարներին, ապա, ըստ ներկայացված՝ մուծման անդորրագրերի, օգոստոսի 30-ի դրությամբ կատարվել է 1 մլն 350 հազար դրամի վճարում: