Անթալիայում ադրբեջանցի քրեական հեղինակություն է սպանվել

Անթալիայի հյուրանոցներից մեկում սպանվել է Ադրբեջանի գլխավոր քրեական հեղինակություն Նադիր Սալիֆովը, որն առավել հայտնի է որպես «Լոտու Գուլի»:

Գլխի շրջանում ծանր վիրավորումով նա տեղափոխվել էր քաղաքային հիվանդանոց, սակայն բժիշկներին չի հաջողվել փրկել նրա կյանքը: Նախնական տվյալներով՝ Սալիֆովի ուղղությամբ կրակել է «Խան Ահմեդ-լինսկիյ» մականունով ադրբեջանցի մեկ այլ քրեական հեղինակություն:

Համացանցում տեսանյութ է շրջանառվում է, թե ինչպես է սպանությունից որոշ ժամանակ առաջ վերջինս քայլ առ քայլ հետեւում Սալիֆովին: Համաձայն տեսանյութի՝ զոհն ու մարդասպանը փաստացի եղել են նույն հյուրանոցում:

Ի դեպ, սպանված «օրենքով գողը» ներքաշված է եղել նաեւ Ռուսաստանում հայերի ու ադրբեջանցիների միջեւ վերջերս տեղի ունեցած ընդհարումներում: Այդ օրերին նա սոցցանցում գրառում էր արել, թե իր ազգի կողքին է, եւ Ռուսաստանում ու մյուս երկրներում լիովին աջակցում է Ադրբեջանին: