Ջուլհակյանը չի բացառում, որ իմքայլականներին ԲՀԿ-ականներն են վարակել

Ազգային ժողովի «Իմ քայլը» խմբակցության պատգամավոր Արուսյակ Ջուլհակյանի համոզմամբ կորոնավիրուսի դեմ պայքարի արդյունավետությունն ուսումնասիրող քննիչ հանձնաժողովի ստեղծումը ժամանակավրեպ է, քանի որ դեռեւս գտնվում ենք համավարակի դեմ պայքարի ակտիվ փուլում:

Պատգամավորը նաեւ պնդում է, որ հանձնաժողովի քննության առարկա պետք է դառնա ոչ միայն կառավարության աշխատանքը, այլեւ՝ ընդդիմադիր խմբակցությունների: Իմքայլական պատգամավորը չի բացառել, որ իրենց խմբակցության պատգամավորներին վարակել են այդ հանձնաժողովի ստեղծումը նախաձեռնող ԲՀԿ-ական պատգամավորները:

«Պետք է պարզել, թե իրենց մոտ քանի՞ հոգի է վարակակիր. բոլորի մասին չէ խոսքը, որ տեղեկություն ունենք»,- ասել է Ջուլհակյանը:

Հիշեցնենք, որ «Բարգավաճ Հայաստան» եւ «Լուսավոր Հայաստան» խմբակցությունները նախաձեռնել են ստեղծել կորոնավիրուսի դեմ պայքարում կառավարության կատարած քայլերի արդյունավետությունն ուսումնասիրող խորհրդարանական քննիչ հանձնաժողով, որի նախագահը պետք է լինի «Լուսավոր Հայաստանից» Արկադի Խաչատրյանը: