Փայլանը Վանի Սբ. Մարինոս եկեղեցու ավերման հարցը տեղափոխել է երկրի խորհրդարան

ԹԱՄԺ պատգամավոր, քրդական Ժողովուրդների դեմոկրատական կուսակցության անդամ Կարո Փայլանը գանձագողերի կողմից Վանի շրջանի պատմական Հայոց ձորի տարածքում (Գյուրփընար) գտնվող Սբ Մարինոս վանք (Սրխու Սուրբ Նշան վանք) ավերման խնդիրը տեղափոխել է թուրքական մեջլիս. հայտնում է t24.com.tr կայքը։

Փայլանը Թուրքիայի Մշակույթի և զբոսաշրջության նախարար Մեհմեթ Նուրի Էրսոյին հարցում է ուղարկել Գյուրփընարի Աքբոյու թաղամասում գտնվող Սբ Մարինոս վանքի՝ գանձագողերի կողմից ավերման դեպքի վերաբերյալ։

«- Սբ. Մարինոս վանքում և շրջակայքում գանձ գտնելու համար փորող անձի կամ անձանց գտնելու և նրանց դեմ գործ հարուցելու համար որևէ գործընթաց սկսվել է՞։
- Սբ Մարինոս վանքը և Վան նահանգի սահմաններում գտնվող քրիստոնյաներին պատկանող այլ պատմական կոթողներն ինչո՞ւ չեն պաշտպանվում ձեր նախարարության կողմից։
-Վանքը վերականգնելու ուղղությամբ որևէ աշխատանք լինելու է՞։
-Վան նահանգում հայերի կողմից կառուցված վանքը, եկեղեցին և մշակութային կառույցները ցուցակագրվել ե՞ն։
-Հայերի մշակութային հետքը ոչնչացնելը մինչ օրս պետական քաղաքականության մաս է եղել։  Չե՞ք կարծում, որ պետք է ցույց տաք այդ քաղաքականության փոփոխությունը»։