Չեխիայի իշխանությունները թույլատրել են մինչև 500 մարդու մասնակցությամբ միջոցառումները

Չեխիայի իշխանությունը որոշել է թուլացնել երկրում կորոնավիրուսի տարածման դեմ ուղղված միջոցառումները՝ հունիսի 8-ից թույլ տալով մինչև 500 քաղաքացիների մասնակցությամբ միջոցառումները. այս մասին գրում է ՏԱՍՍ-ը՝ վկայակոչելով երկրի առողջապահության նախարար Ադամ Վոյտեխի հայտարարությունը:

Ըստ Վոյտեխի՝ նման միջոցառումների ժամանակ և այլ հանրային վայրերում երկրի բոլոր բնակիչների համար դիմակներ կրելը դեռևս պարտադիր է մնում, բացի լողափերից և լողավազաններից։:

Բացի այդ, հանրապետության կինոթատրոնների և թատրոնների այցելուներն այլևս պարտավոր չեն միմյանց միջև 2 մետր հեռավորություն պահպանել: Այս օրենքը հունիսի 8-ից կտարածվի նաև ռեստորանների և սրճարանների այցելուների վրա․ նրանք կկարողանան ավելի մոտ նստել միմյանց։

Հիշեցնենք՝ ըստ պաշտոնական տվյալների, Չեխիայում կորոնավիրուսով վարակվել է 9609 մարդ, նրանցից մահացել է 327-ը, 6,890 մարդ ապաքինվել է։