Թրամփը ներկա չի գտնվի ոստիկանի կողմից սպանված Ջորջ Ֆլոյդի հիշատակի արարողություններին

ԱՄՆ նախագահ Դոնալդ Թրամփը չի նախատեսում այցելել Մինեապոլիսում ոստիկանի կողմից սպանված Ջորջ Ֆլոյդի հրաժեշտի արարողությանը. այս մասին գրում է Интерфакс-ը՝ Bloomberg-ին հղումով։

Նշվում է, որ Ֆլոյդի հիշատակին մի քանի արարողություններ են անցկացվելու: Հինգշաբթի դրանք տեղի են ունեցել Մինեապոլիսում և Նյու Յորքում, իսկ հանգստյան օրերին կանցկացվեն Հյուսիսային Կառոլինա նահանգի Ռայֆորդ քաղաքում, երկուշաբթի՝ տեխասյան Հյուսթոնում:

Հիշեցնենք, որ մայիսի 25-ին Մինեապոլիսի ոստիկանները բռնել էին աֆրոամերիկացի Ջորջ Ֆլոյդին։ Ձերբակալելու ընթացքում ոստիկանը տղամարդուն պառկեցրել է գետնին ու ծնկով սեղմել է նրա վզին։ Անտեսելով տղամարդու շնչել չկարողանալու մասին փաստը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է: