Հայաստանում` դատական հայցեր, Վրաստանում` ֆիզիկական հաշվեհարդար. զեկույց լրագրողների վրա հարձակումների մասին

Երեկ Մամուլի ազատության միջազգային օրվա կապակցությամբ «Արդարություն լրագրողների համար» հիմնադրամը հրապարակել է 2017-2019 թթ. հետխորհրդային տարածքում լրագրողների վրա հարձակումների մասին զեկույցի երկրորդ մասը, որը նվիրված է Հայաստանին, Վրաստանին և Մոլդովային ու վերլուծում է լրագրողների, բլոգերների և ԶԼՄ այլ աշխատակիցների վրա հարձակման 694 փաստ. ըստ yerkir.am-ի` տեղեկացնում է apsny.ge-ն:

Հիմնադրամի վերլուծության համաձայն` ԶԼՄ աշխատակիցների վրա հարձակումները երեք հիմնական տիպի են լինում`

1. ֆիզիկական և կյանքին, ազատությանն ու առողջությանը սպառնալիքներ,

2. ոչ ֆիզիկական բնույթի կամ կիբերտարածքում,

3. իրավական և տնտեսական մեխանիզմների կիրառմամբ:

Կարևոր է, որ դիտարկվող երեք տարիների ընթացքում ԶԼՄ որևէ աշխատակից չի զոհվել:

Ըստ զեկույցի` եթե Հայաստանում լրագրողների հետ կոնֆլիկտի լուծման հիմնական մեթոդը դատական հայցն է, ապա Վրաստանում գերակշռում են ֆիզիկական հարձակումները, իսկ Մոլդովայում դրանք հիմնականում կիբերհարձակումներ են: Այդ երկու երկրներում լրագրողների դեմ դատական հայցերի թիվը զգալիորեն փոքր է: