Ի հիշատակ Հայոց ցեղասպանության զոհերի՝ Վերսալյան պալատում համերգ կկայանա

Ֆրանսիայում՝ Վերսալյան պալատի թագավորական մատուռում ապրիլի 24-ին կկայանա համերգ՝ նվիրված 1915 թ. Հայոց ցեղասպանության զոհերի հիշատակին. ըստ Yerkir.am-ի՝ այս մասին գրում է Վերսալի թագավորական տաճարի կայքը:

Նշվում է, որ համերգի ժամանակ այդ քաղաքն այն վայրը կդառնա, «որտեղ հնարավոր կլինի հայ ժողովրդի ձայնը լսել երաժշտության միջոցով, որը նրա բազմադարյա պատմության խորհրդանիշն է»:

Համերգի ընթացքում ելույթ կունենան դասական երաժշտության կատարողներ՝ սոպրանո Մելոդի Լուլեջյանը, ջութակահարուհի Շուշան Սիրանոսյանը, թավջութակահար Աստղիկ Սիրանոսյանը և դաշնակահար Վարդան Մամիկոնյանը:

Հավելվում է, որ դահլիճում կհնչեն Առնո Բաբաջանյանի, Արամ Խաչատրյանի և Կոմիտասի ստեղծագործությունները: