Եթե Քելբաջարը պահելը համախմբման կոչ պիտի լինի, Տեր-Պետրոսյանն ու նրա Կառավարությունը հրաժարական կտան. Ժիրայր Լիպարիտյան

ԱՄՆ Հայ դատի հանձնախմբի գործադիր տնօրեն Արամ Համբարյանն, ըստ Yerkir.am-ի, իր ֆեյսբուքյան էջում գրառում է կատարել:

Նա, մասնավորապես, նշել է.

«Ըստ ԱՄՆ Պետական քարտուղարության (Արտաքին գործերի նախարարություն) գաղտնազերծված փաստաթղթի՝ 1993թ. մայիսի 29-ին, ՀՀ-ում ԱՄՆ-ի առաջին դեսպան Հարրի Գիլմորի հետ առաջին հանդիպման ընթացքում, ՀՀ Արտաքին գործերի նախարարի պաշտոնակատար Ժիրայր Լիպարիտեանը ցանկացել է շեշտել հետևյալը. «Եթե Քելբաջարը պահելը ներկա Հայաստանի բնակչության համար համախմբման կոչ պիտի լինի (ինչպես այն եղել է Սփյուռքում շատ հայերի և հատկապես դաշնակցականների համար), Տեր-Պետրոսյանն (խոսքը 1991-1998 թթ. ՀՀ նախագահ Լևոն Տեր-Պետրոսյանի մասին է՝ խմբ.) ու նրա Կառավարությունը հրաժարական կտան, քանի որ նրանք չեն ցանկանում դրա մաս կազմել»: Աղբյուրը՝ 5/29/1993 Confidential State Department cable (released under the Freedom of Information Act)»: