Նիկոլ Փաշինյանին հարց տված ադրբեջանցի «բլոգերն» իր թեկնածությունն է առաջադրել խորհրդարանական ընտրություններում

Ադրբեջանցի Աթա Աբդուլաևը, ով ներկայանում է, որպես բլոգեր, որոշել է մասնակցել փետրվարի 9-ին Ադրբեջանում նախատեսվող խորհրդարանական ընտրություններին և առաջադրել է իր թեկնածությունը: «Բլոգերն» արդեն դիմել է երկրի ԿԸՀ, սակայն դեռ չի ստացել պատասխան:

Հիշեցնենք, որ Աբդուլաևն այն ադրբեջանցին էր, ով 2019 թ. նոյեմբերին «ներխուժել» էր Միլանում գտնվող Հայ առաքելական Սուրբ Քառասուն Մանկունք եկեղեցի, որտեղ ելույթ էր ունենում Իտալիայում գտնվող Նիկոլ Փաշինյանը: Աբդուլաևը ներկայացել էր որպես բլոգեր և ցանկացել հարց հղել ՀՀ վարչապետին, որն էլ նրան թույլատրվել էր:

Աբդուլաևը պահանջել էր Փաշինյանից «դուրս բերել հայկական զորքերը Լեռնային Ղարաբաղից» և մեղադրել հայերին «ցեղասպանություն» կատարելու մեջ:

Սոցցանցերի հայ օգտատերերին շատ արագ հաջողվեց պարզել, որ «բլոգերն» իրականում կապված է ադրբեջանական հատուկ ծառայությունների հետ և հարում է մերձալիևյան շրջանակներին: