Սամվել Բաբայանը չի կարողանա Արցախի նախագահի թեկնածու առաջադրվել

Արցախի խորհրդարանն այսօր որոշել է նստաշրջանի օրակարգ մտցնել նաև քաղաքացիական նախաձեռնության կարգով ԱԺ ներկայացված «Արցախի Հանրապետության Սահմանադրությունում փոփոխություններ կատարելու մասին» նախագիծը: Այն խորհրդարանին ներկայացրել է նախաձեռնող խմբի լիազոր ներկայացուցիչ Վլադիմիր Պողոսյանը:

Սահմանադրական փոփոխությունների նախագծով առաջարկվել է փոփոխություն կատարել ԱՀ Սահմանադրության 48-րդ հոդվածի 2-րդ և 3-րդ մասերում՝ Արցախի Հանրապետության նախագահի թեկնածու և Ազգային ժողովի պատգամավորի թեկնածու առաջադրվելու իրավունք տալով նաև Հայաստանի Հանրապետության քաղաքացիներին, իսկ մշտական բնակության ընտրական ցենզը նվազեցնել՝ նախագահի թեկնածուի համար 10 տարին դարձնելով 3, իսկ պատգամավորի թեկնածուի համար 5 տարվա փոխարեն սահմանելով 3 տարի:

4 կողմ, 24 դեմ և 1 ձեռնպահ ձայների հարաբերակցությամբ նախագիծը մերժվել է:

Նշենք, որ այս նախագիծը Արցախի պաշտպանության նախկին նախարար, Արցախի հերոս Սամվել Բաբայանի նախաձեռնության հետ էր կապված: Բաբայանը ցանկանում էր մասնակցել Արցախում կայանալիք նախագահական ընտրություններին, ուստի մշտական բնակության պահանջը անհրաժեշտ էր հանել Սահմանադրությունից: