Սիրիայի քրդերը նախնական ռազմական պայմանագիր են կնքել Դամասկոսի հետ

Քրդական խմբավորումները համաձայնության են եկել Սիրիայի իշխանությունների հետ Թուրքիայի հետ սահմանին կառավարական զորքեր տեղակայելու շուրջ. ըստ Reuters-ի՝ ասվում է քրդական ինքնավարության ներկայացուցիչների կողմից տարածված հայտարարության մեջ:

Նշվում է, որ սիրիական իշխանությունների հետ համաձայնություն է ձեռք բերվել, որի նպատակն է դիմակայել Թուրքիայի ագրեսիային:

Սիրիացի զինվորականները կտեղակայվեն սահմանի երկայնքով, որպեսզի աջակցություն ցուցաբերեն «Սիրիայի ժողովրդավարական ուժեր»-ին, որոնց հիմնական մասը քուրդ մարտիկներն են:

«Վերջին հինգ օրերին Սիրիայի հյուսիս ներխուժած թուրքական զորքերը բազմաթիվ հանցագործություններ են կատարել քաղաքացիական բնակչության դեմ: Ագրեսորներին համատեղ հակահարված տալու համար մենք համաձայնության ենք եկել սիրիական կառավարության հետ, որը պետք է պաշտպանության տակ վերցնի ազգային ինքնիշխանությունն ու սահմանը»,- նշված է հայտարարության մեջ:

Համաձայնագիրը «թույլ կտա ազատել թուրքական իշխանությունների և նրանց կողմից կռվող վարձկանների գրաված բոլոր սիրիական շրջանները, այդ թվում՝ Աֆրինը»,- պարզաբանել է քրդական կողմը:

Հիշեցնենք, որ Թուրքիայի նախագահ Ռեջեփ Թայիփ Էրդողանը հայտարարել է, որ երկրի ԶՈւ-ն սկսել են «Barış Pınarı-Խաղաղության ակունք» ռազմական գործողությունը Սիրիայում: