Թուրքիայի ռազմական գործողության հետևանքով Սիրիայում 8 զոհ և բազմաթիվ վիրավորներ կան. CNN

«Սիրիայի ժողովրդավարական ուժեր» (SDF) խմբավորման տվյալներով՝  Սիրիայի հյուսիսում Թուրքիայի ռազմական գործողությունների հետևանքով արդեն կան զոհեր՝ առնվազն 8, և բազմաթիվ վիրավորներ. հայտնում է CNN-ը:

«Երեք զինյալ և  քաղաքացիական հինգ անձ է զոհվել: Բազմաթիվ վիրավորներ կան թուրքական ուժերի կողմից սահմանամերձ քաղաքներն ամբողջ երկայնքով կրակի տակ առնելու հետևանքով»,- ասվում է «Սիրիայի ժողովրդավարական ուժեր»-ի հայտարարության մեջ:

Թուրքական ԶՈւ-ն հարվածներ է հասցրել 181 ռազմական թիրախի։ 

Ավելի վաղ տեղեկացրել էինք, որ Թուրքիան սկսել է «Խաղաղության ակունք» ռազմական գործողությունը Սիրիայի հյուսիսում չորեքշաբթի՝ հոկտեմբերի 9-ին, բազմաթիվ զրահատեխնիկա և օդուժ կիրառելով սահմանի երկայնքով: Ռազմական գործողությունները սկսվել են ընդամենը մի քանի օր անց այն բանից, երբ ԱՄՆ նախագահ Դոնալդ Թրամփը հայտարարեց ամերիկյան զորքը Սիրիայից դուրս բերելու որոշման մասին: