«Իմ քայլը» խմբակցությունը նիստ կանի՝ ՍԴ-ի շուրջ ստեղծված իրավիճակի հետ կապված

«Իմ քայլը» այսօր նիստ է հրավիրել ՔՊ գրասենյակում։ Գրասենյակ են արդեն եկել մի շարք պատգամավորներ։

Լրագրողների հարցին, թե ինչ հարցեր են նիստի օրակարգում, պատգամավոր Հայկ Գևորգյանը պատասխանեց, որ չգիտի, և խնդրեց, որ իրեն միայն տնտեսությունից հարցեր տան։

Միևնույն ժամանակ, պատգամավոր Հովհաննես Իգիթյանն ԱԱԾ տնօրեն Արթուր Վանեցյանի վերաբերյալ լրագրողների հնչեցրած հարցերին որևէ պատասխան չտվեց:

ԱԺ նախագահ Արարատ Միրզոյանը նույնպես խուսափեց պատասխանել  լրագրողների հարցերին։

Այս պահին գրասենյակում են արդեն Հակոբ Սիմիդյանը, Հովհաննես Իգիթյանը, Տիգրան Կարապետյանը, Արման Բոշյանը, Ռուստամ Բաքոյանը և այլ պատգամավորներ։

Ավելի վաղ ԱԺ «Իմ քայլը» խմբակցության ղեկավար Լիլիթ Մակունցը ԱԺ-ում լրագրողների հետ զրույցում, անդրադառնալով Սահմանադրական դատարանում ստեղծված իրավիճակի շուրջ ԱԺ-ի կողմից ակնկալվող քայլերի թեմային, նշել էր. «Հենց այսօր տեղի է ունենալու «Իմ քայլը» խմբակցության նիստ, որի ընթացքում էլ կորոշենք մեր քայլերը»: