Մահացել է անվանի լիբանանահայ երգիչ և կոմպոզիտոր Ադիս Հարմանդյանը

Սեպտեմբերի 1-ին 74 տարեկան հասակում մահացել է անվանի լիբանանահայ երգիչ և կոմպոզիտոր Ադիս Հարմանդյանը։

Հայկական էստրադային երաժշտությունը սկսվել է Հարմանդյանի հիթերով: Առաջինը լույս է տեսել և հանրաճանաչ դարձել «Ծաղիկներ» երգը։ Հայտնի երգերից են «Նունե», «Գարուն, գարուն», «Այլ աչեր», «Ախթամար»: Թողարկել է մոտավորապես 30 ալբոմ։

Ըստ Ֆրանսիայի Հայ դատի գրասենյակի ղեկավար՝ Լիբանանում ծնված-մեծացած Հրաչ Վարժապետյանի՝  Հարմանդյանը երկու սերնդի համար անփոխարինելի, հարազատ, սիրելի երգիչ էր՝ անխտիր բոլորի, բոլոր ճաշակները գոհացնող, սակայն Ադիսի ամենամեծ ներդրումն այն է, որ 1960-1970-ականներին մասնակից եղավ մայր գաղութի` Լիբանանի հայահոծ թաղամասերում թուրքերենն ու թուրքական երգն արմատախիլ անելու և այն հայերենով փոխարինելու արշավին: 

«Վարձքդ կատար, վարպե՛տ: Լույս` հոգուդ»,- ֆեյսբուքյան իր էջում գրել է Հրաչ Վարժապետյանը: