Հայաստանն ունի այդ հանձնառությունը՝ ապահովել Արցախում ազատ, արդար, ժողովրդավարական ընտրությունների կայացումը. փոխվարչապետ

Կարծում եմ` Հայաստանի և Արցախի միջև որևէ լարվածություն չկա և չի լինելու. լրագրողների հետ ճեպազրույցում այսօր այս մասին հայտարարեց ՀՀ փոխվարչապետ Տիգրան Ավինյանը։

Անդրադառնալով վարչապետ Նիկոլ Փաշինյանի՝ Արցախում հնչեցրած այն հայտարարությանը, թե ՀՀ-ն կլինի Արցախի ժողովրդի ազատ կամարտահայտման և այդ կամարտահայտման միջոցով լեգիտիմ իշխանության ձևավորման երաշխավորը, Ավինյանն ասաց.

«Կարծում եմ, որ Հայաստանն ունի այդ հանձնառությունը՝ ապահովել Արցախում ազատ, արդար, ժողովրդավարական ընտրությունների կայացումը, և մենք լիովին պատրաստ ենք այդ հանձնառությունը կյանքի կոչելու»։

Դիտարկմանը` հնարավոր է, որ Արցախում նախընտրական իրավիճակը վերահսկողությունից դուրս գա՝ հաշվի առնելով օգոստոսի 5–ին Ստեփանակերտում տեղի ունեցած համահայկական հանրահավաքի ընթացքում Բակո Սահակյանին ուղղված հրաժարականի կոչերը։

«Ես համարում եմ, որ Հայաստանի և Արցախի քաղաքացիներն իրենց կամարտահայտման մեջ պետք է լինեն ազատ։ Այդ օրը տարբեր վանկարկումներ հնչեցին, սակայն  հավաքը, ընդհանուր առմամբ,  շատ հաջողված էր և դրական, իսկ վարչապետի ելույթը՝ ընկալելի»,–բացատրեց նա։