Թուրք ոստիկանները ձերբակալել են Հասանքեյֆում կամավոր պարեկություն անող մի խումբ անձանց

Ըլըսու ջրամբարի նախագծով վտանգի տակ գտնվող պատմական Հասանքեյֆի (հայ. Հարսնքվ) և Տիգրիսի հովտի պահպանության համար կամավորական պարեկություն իրականացնող քրդամետ Ժողովուրդների դեմոկրատական կուսակցության 10 երիտասարդ ձերբակալվել է թուրք ոստիկանների և զինվորների կողմից:

ԺԴԿ-ի` Բաթմանից պատգամավոր Այշե Աջար Բաշարանը կուսակցության երիտասարդների հետ զբոսանքի է դուրս եկել պատմական տարածքներով, վանկարկել են «Հասանքեյֆը պատմություն է, տեր կանգնիր պատմությանը» կարգախոսը: Ոստիկաններն ու զինվորականները զգուշացրել են նրանց, որ այդ կարգախոսն արգելված է, հետո ձերբակալել են 10 երիտասարդի. հաղորդում է gazetekarinca.com կայքը:

Նշենք, որ 12.000 տարվա պատմություն ունեցող նշանավոր քաղաքը հայտնվել է ոչնչացման եզրին: Տիգրիս գետի ափին կառուցվող Ըլըսու ջրամբարի հետևանքով քաղաքի պատմական հուշարձանները կարող են հայտվել ջրի տակ: Չնայած բողոքներին` իշխանությունները շարունակում են ջրամբարի կառուցման աշխատանքները:

Մեծ Հայքի Աղձնիք նահանգում գտնվող Հարսնքվը բնակեցվել է դեռևս մ.թ.ա 10.000-ական թվականներին և համարվում է մարդկության ամենավաղ բնակեցված բնակավայրերից մեկը: Այնտեղ են գտնվում նեոլիթյան դարաշրջանի քարանձավներ, Հռոմեական շրջանի ամրոց, Արթուկյանների և Օսմանյան շրջանից մնացած շինություններ: