Հյուսիսային Կորեան ռուսական նավ է ձերբակալել

Հյուսիսկորեացի սահմանապահները ձերբակալել են ռուսական «Սյանխայլին-8» ձկնորսական նավը, որը պատկանել է Հյուսիս-արևելյան ձկնորսական ընկերությանը. հայտնում է РИА Новости-ն:

Նշվում է, որ միջադեպը տեղի է ունեցել հուլիսի 17-ի գիշերը: Նավում եղել է 17 մարդ:

Ընկերության փոխտնօրեն Սերգեյ Սեդլերը հայտնել է, որ նավաստիների հետ մինչ օրս չի հաջողվում կապ հաստատել, Փհենյանում ռուսական դեսպանատան ներկայացուցչին միայն երեկ է հաջողվել այցելել գրավված նավը: Նավաստիներին չեն թույլատրում լքել այն:

Ո’չ ռուսական դիվանագիտական գերատեսչությանը, ո’չ ընկերությանը հայտնի չէ` երբ կսկսվի կատարվածի փաստով դատական գործընթացը:

РБК-ն գրում է, որ նավը մեղադրվում է սահմանի անօրինական խախտման մեջ, թեև ձերբակալվել է ափից 53 ծովային մղոն հեռու, մինչդեռ ՄԱԿ-ի Ծովային իրավունքի  մասին կոնվենցիայի համապատասխան` տարածքային ջրեր են համարվում ափից 12 ծովային մղոն հեռու գտնվողները: