Այլևս որևէ մեկին մենք թույլ չենք տալու, որ անօրինական գործողություններ կատարեն, մտնեն անտառ. ոստիկանապետ

Իջևանում գտնվող ոստիկանապետ Վալերիյ Օսիպյանը հանդիպել է բողոքի ակցիա իրականացնող ցուցարարների հետ: Հիշեցնենք, որ բողոքի ակցիան Իջևանում մեկնարկել է երեկ երեկոյան, ցուցարարները ճանապարհ են փակել` պահանջելով թույլ տալ անտառահատուներ իրականացնել:Երեկ նաև բախումներ են արձանագրվել ոստիկանների ու ցուցարարների միջև, որի հետևանքով նաև ոստիկաններ են տուժել:

«Այլևս որևէ մեկին մենք թույլ չենք տալու, որ անօրինական գործողություններ կատարեն, մտնեն անտառ»,-ցուցարարներին ասաց Վալերիյ Օսիպյանը:

Վալերիյ Օսիպյանը հավաստիացրեց, որ երեկ բողոքի ակցիայի ժամանակ ոստիկանության գործողությունները իրավաչափ են եղել, օրենքին համապատասխան:«Երբ դիմացինը փորձում է անկանոն շարժումներ անել և խոչընդոտել ոստիկանության օրինական գործողություններին, չեմ բացառում, որ դրանց ընթացքում կապտուկներ առաջանան: Բայց որ ոստիկանության գործողությունները զուգորդվեն բռնությամբ, բացառում եմ, հնարավոր չէ»,- ասաց Վալերիյ Օսիպյանը: