Էրդողանը մեղավոր չէ Ս-400-ի շուրջ ստեղծված իրավիճակի համար. Թրամփ

ԱՄՆ նախագահ Դոնալդ Թրամփը հայտարարել է, որ իր թուրք գործընկեր Ռեջեփ Թայիփ Էրդողանը մեղավոր չէ ռուսական Ս-400 համակարգերի գնման շուրջ ստեղծված իրավիճակի համար. հայտնում է РИА Новости-ն:

Այդ մասին նա ասել է Օսակայում G20 –ի գագաթնաժողովի շրջանակում մամուլի ասուլիսի ժամանակ:

«Նա չէր կարող ոչինչ անել, նա արդեն գնել էր դրանք»,-ասել է Թրամփը` հավելելով, որ նախկին նախագահ Բարաք Օբամայի օրոք Թուրքիան ցանկացել է ձեռք բերել Patriot հրթիռներ, սակայն երկրին մերժել են:

Թրամփը նշել է, որ Էրդողանին վերաբերվում է «շատ արդարացի» և ընդհանուր առմամբ իրավիճակը «խճճված» է:

Հիշեցնենք, որ ԱՄՆ-ը դժգոհ է, որ Թուրքիան մտադիր է ձեռք բերել ռուսական Ս-400 համակարգերը, ինչը լարվածություն է առաջացրել երկու երկրների միջև: