Փաշինյանը Մասիսում մասնակցել է Ֆրանկոֆոնիայի զբոսայգու բացմանը. Մասիսի քաղաքապետը ներկա չի եղել

Վարչապետ Նիկոլ Փաշինյանն այսօր՝ հունիսի 25-ին, այցելել է Մասիս քաղաք՝ մասնակցելու  Ֆրանկոֆոնիայի զբոսայգու և Ընտանեկան մարզահամալիրի բացման հանդիսավոր արարողությանը: Մասիս համայնքի ղեկավար Դավիթ Համբարձումյանը չի մասնակցել միջոցառմանը:

Լրագրողների հարցին, թե ինչո՞ւ քաղաքապետը ներկա չէ Ֆրանկոֆոնիայի զբոսայգու և Ընտանեկան մարզահամալիրի բացման արարողությանը, Արարատի մարզպետ Գարիկ Սարգսյանը պատասխանեց. «Հրավիրող կողմը «AFFA» բարեգործական հիմնադրամն է, կարող եք իրենց ուղղել ձեր հարցը»:

Դիտարկմանը՝ ինչպիսի՞ հարաբերություններ ունի Մասիսի քաղաքապետի հետ, երբ ժողովրդական շարժման օրերին խոչընդոտում էր ցուցարարների գործողություններին, եղել են անգամ քրեական գործեր, մարզպետն արձագանքեց, որ հարաբերությունները զուտ աշխատանքային են՝ քաղաքապետ-մարզպետ: «Բոլոր համայնքների ղեկավարների հետ էլ աշխատել ստացվում է, եթե պատրաստ են աշխատել»,- հավելեց Գարիկ Սարգսյանը:

Ինչ վերաբերում է իր պաշտոնանկության մասին խոսակցություններին և իր կողմից արված վերջին հայտարարություններին ու  դրանց` իրականությանը համապատասխան լինելուն, Արարատի մարզպետը նշեց. «Այդ հարցին կարող է պատասխանել միայն վարչապետը»: