Չնայած ՀՆԱ աճին՝ մեր երկրում կյանքի որակի փոփոխություն այդպես էլ տեղի չի ունենում․ Թանդիլյան

Ազգային ժողովում  Հայաստանի 2018թ. բյուջեի կատարման մասին ֆինանսների նախարարի հաշվետվությունից հետո ԱԺ ֆինանսական և բյուջետային հանձնաժողովի նախագահ Մանե Թանդիլյանն ընդգծեց, որ, չնայած ներկայացված ցուցանիշներին ու ՀՆԱ աճին, Հայաստանի կյանքի որակի փոփոխություն չի լինում։

Ֆինանսների նախարար Ատոմ Ջանջուղազյանն ասաց, որ համաշխարհային տնտեսությունը 2018 թվականին աճել է 3,6 տոկոսով, Եվրամիությանը՝ 2,1 տոկոսով, ԵԱՏՄ-ում՝ 2,5 տոկոսով։ Նա առաջարկեց այս թվերի հետ համեմատել Հայաստանի տնտեսական աճը։

Դիտարկմանը, թե մարդկանց կյանքում ոչինչ չի փոխվում, նախարարն արձագանքեց, որ չի կարող չփոխվել։ Ըստ նրա` թեև դրանք միջինացված ցուցանիշներ են ու թույլ չեն տալիս դատողություններ անել ամեն անհատի մասին, բայց միջինացված ազդեցություն եղել է։