Եթե ԱՄՆ-ն Ռուսաստանի նման լավ առաջարկ աներ, կընդունեինք. Էրդողան

Թուրքիայի նախագահ Ռեջեփ Թայիփ Էրդողանը տոնական նամազից հետո լրագրողների հետ զրույցում անդրադարձել է ամերիկյան և ռուսական զինատեսակների գնման հարցերին:

«Եթե Ռուսաստանի նման դրական առաջարկ կա, մենք «Պատրիոտ»-ի թեմայի ուղղությամբ քայլ կկատարենք: Բացի այդ` դրա մասին նաև իրենց ենք ասել: Սակայն «Պատրիոտ»-ի թեմայով մեզ ԱՄՆ-ի կողմից, ցավոք, Ս-400-ների նման ոչ մի դրական առաջարկ չի եկել»,- Էրդողանի խոսքերն է մեջբերում «Սպուտնիկ»-ի թուրքական ծառայությունը:

Թուրքիայի նախագահը ևս մեկ անգամ վերահաստատել է Ս-400-ներից չհրաժարվելու վճռականությունը: «Մենք արդեն պայմանագիր ունենք, վճռականություն ունենք: Այստեղ խոսք անգամ չի կարող գնալ հետքայլի մասին»,- հայտարարել է նա: