Դերսիմի նորընտիր քաղաքապետը քաղաքապետարանի մուտքի «Թունջելի» գրառումը փոխարինել է «Դերսիմ»-ով

Դերսիմի նորընտիր քաղաքապետ, կոմունիստ Ֆաթիհ Մեհմեթ Մաչօղլուն Թուրքիայի Դերսիմ քաղաքի քաղաքապետարանի մուտքի «Թունջելի»  գրառումը փոխարինել է «Դերսիմ»-ով. հաղորդում է t24.com.tr կայքը:

«Մենք չենք եկել այստեղ, որպեսզի Դերսիմ անունը քաղաքականացնենք, հակառակը` սա ժողովրդի պահանջների իրականացում է: Որոշումն ուղարկվել է նահանգապետարան, կանենք այնպես, ինչպես նրանք կորոշեն: Ժողովուրդը Դերսիմ անունն է օգտագործում: Դերսիմ անունը երկար ժամանակ է` օգտագործում են նախագահն ու այլ պաշտոնյաներ»,- հայտարարել է Մաչօղլուն:

Նշենք, որ պատմական Դերսիմ նահանգը, որտեղ ներկայումս, ըստ տարբեր աղբյուրների, ապրում են բազմաթիվ ծպտյալ հայեր, անվանափոխվել է Թունջելի Թուրքիայի Հանրապետության հիմնադիր Մուսթաֆա Քեմալի կողմից 1937 թ.` Դերսիմի ապստամբությունը ճնշելուց հետո, սակայն Թունջելի անունը, չնայած պաշտոնական լինելուն, լայն տարածում չի գտել: