Թուրքիայում հայ երեխային հրապարակային կրոնափոխ են արել

Թուրքական ATV հեռուստաընկերությունում կրոնական քարոզչական հաղորդում վարող, իսլամիստ քարոզիչ Նիհաթ Հաթիփօղլուն ուղիղ եթերում Արթուր անունով երեխայի կրոնափոխ է արել. հաղորդում է թուրքական Evrensel կայքը:

Ստամբուլի Սուլթանահմետ հրապարակից ուղիղ եթերով հեռարձակվող երեկոյան հաղորդման ժամանակ Հաթիփօղլուն կրոնափոխ է անում 13-ամյա հայ Արթուրին, որը ցանկություն է հայտնում վերցնելու Նիհաթ անունը: Հաթիփօղլուն նշել է, որ ստացել է երեխայի ծնողների համաձայնությունը:

Արթուրը Հաթիփօղլուի հաղորդումներում կրոնափոխ եղած 21-րդ երեխան է, և շոուի վերածված այս կրոնափոխությունը քննադատության մեծ ալիք է բարձրացրել Թուրքիայում:

Նշենք, որ Հաթիփօղլուն համարվում է Էրդողանի ամենահավատարիմ մարդկանցից մեկը: Նրա տարեկան 600.000 լիրա աշխատավարձը և թուրքական համալսարանի ռեկտոր նշանակվելու որոշումը շարունակական քննադատությունների պատճառ է դարձել:

Հավելենք նաև, որ, ըստ տեղեկությունների, Արթուրը աշխատանք փնտրելու նպատակով Թուրքիա տեղափոխված հայ ներգաղթյալների ընտանիքից է:

Տեսանյութն` այստեղ: