«ԱՄՆ-ը լուրջ է վերաբերվում ԼՂ հակամարտության կարգավորման հարցում իր պատասխանատվությանը»

ԱՄՆ պետքարտուղարի՝ Եվրոպայի և Եվրասիայի հարցերով օգնական Ջորջ Քենթը հայտնել է, որ ԱՄՆ-ը՝ որպես ԵԱՀԿ Մինսկի խմբի համանախագահ երկիր, լուրջ է վերաբերվում ԼՂ հակամարտության կարգավորման հարցում իր պատասխանատվությանը. հայտնում է Trend-ը:

«Ուրախ ենք, որ հանդիպումներ են տեղի ունեցել երկրների ղեկավարների և ԱԳ նախարարների մակարդակով: Կողմերը պայմանավորվածություն են ձեռք բերել շփման գծում լարվածության թուլացման և հրադադարի խախտումների նվազման վերաբերյալ: Հայաստանի և Ադրբեջանի ԱԳ նախարարների վերջին հանդիպման ընթացքում Մոսկվայում բավարար համաձայնություններ են ձեռք բերվել։ ԱՄՆ-ն ապագայում կարող է անցկացնել ԱԳ նախարարների հանդիպում: Ինչ վերաբերում է հաջորդ հանդիպմանը` չեմ կարող ասել, թե հանդիպման վայրը որոշել ենք, բայց վստահ եղեք, որ ԱՄՆ-ն լուրջ է վերաբերվում իր պարտականություններին: Մենք ցանկանում ենք աջակցել գործընթացին, որը կհանգեցնի խնդրի խաղաղ կարգավորմանը»,- ասել է ամերիկացի պաշտոնյան: