Ֆեյքերին պատերազմ հայտարարելով` Փաշինյանն Ալիև է դառնում. քաղաքագետ

Քաղաքագետ Նարեկ Սամսոնյանը երեկ բաց նամակով դիմել է ԱԱԾ պետին, որ պատրաստ է օժանդակել` գտնելու կեղծ օգտահաշիվները:

Այսօր լրագրողների հետ զրույցում, անդրադառնալով վարչապետ Նիկոլ Փաշինյանի` ԱԱԾ պետ Արթուր Վանեցյանին տված հրահանգին սոցիալական ցանցերի կեղծ օգտատերերին հայտնաբերելու վերաբերյալ,  նա նշեց, որ խնդիրը երկու կողմ ունի: Առաջինը, ըստ Սամսոնյանի, այն է, որ Փաշինյանն անցում է հնարավոր բոլոր կարմիր գծերը: «Մենք տեսնում ենք, որ ոչ թե Ալիևն է դառնում ժողովրդավար, այլ Նիկոլ Փաշինյանն է դառնում Ալիև. Ադրբեջանում ոչ միայն ֆեյքերը, այլև ցանկացած հրապարակում ենթակա է նմանատիպ գրաքննության»,- ասաց նա:

Հարցի երկրորդը կողմը, ըստ Սամսոնյանի, բարոյական մասն է: «Բարոյական ի՞նչ իրավունքով է նման հայտարարություն անում մի մարդ, որի ամբողջ գործունեությունը պարզապես ֆեյք է, որն իր կառավարման առաջին իսկ օրից մինչ այսօր միայն օդիոզ հայտարարություններ է արել: Նիկոլ Փաշինյանը թող կանչի կառավարության հայտնի ՊՈԱԿ-ի ղեկավար` «Մաեստրո» Հովհաննես Մովսիսյանին, ու նա կբացատրի, թե ինչպես է տարվում այդ աշխատանքը: Եթե ֆեյքերի այսքան ֆաբրիկա ունեցող մարդը բարոյական իրավունք ունի բողոքելու, մարդկանց ծնոտներին տալու, ջարդելու-փշրելու, իր ցուցումներով քրեական գործեր հարուցելու, ապա ես, անկեղծ ասած, նախանձում եմ ԱԱԾ պետ Արթուր Վնեցյանի համբերությանը»,- նշեց քաղաքագետը: