Զոհրաբ Մնացականյանը կմեկնի Ռուանդա՝ մասնակցելու ռուանդական ցեղասպանության 25-ամյա տարելիցին նվիրված միջոցառմանը

Մարտի 21-22-ը Հայաստան կայցելի Շվեդիայի Թագավորության միջազգային զարգացման համագործակցության նախարար Պետեր Էրիկսոնի գլխավորած պատվիրակությունը: Նախատեսված են հանդիպումներ ՀՀ բարձրաստիճան պաշտոնյաների հետ: Այս մասին լրագրողներին հայտնեց ՀՀ ԱԳՆ մամուլի խոսնակ Աննա Նաղդալյանը:

Նա տեղեկացրեց նաև, որ մարտի 26-28-ը մեր երկիր կայցելի ԵԽԽՎ նախագահ Լիլիան Մորի Պասկեն:

«Ապրիլի 2-ին մեկնարկելու է ՀՀ ԱԳ նախարարի այցը աֆրիկյան տարածաշրջան, մասնավորապես՝ Եթովպիա և Ռուանդա: Ապրիլի 7-ին Ռուանդայում արտաքին գործերի նախարարը մասնակցելու է Ռուանդայի ցեղասպանության 25-ամյա տարելիցին նվիրված միջոցառմանը»,-հայտնեց Նաղդալյանը՝ հիշեցնելով, որ Հայաստանը և Ռուանդան միջազգային կառույցներում սերտորեն համագործակցում են Ցեղասպանության և մարդկության դեմ հանցագործությունների կանխարգելման օրակարգի շուրջ: