ԵՄ-ն ողջունում է Ադրբեջանում քաղբանտարկյալների ազատ արձակումը

Եվրամիությունը ողջունում է Ադրբեջանում 400 քաղբանտարկյալի ազատ արձակումը, որը տեղի է ունեցել Նովրուզի տոնակատարության առիթով: Այս մասին տեղեկացնում է  DW.com-ը` հղում անելով Եվրոպական արտաքին քաղաքականության ծառայության պաշտոնական հայտարարությանը:

Նշվում է, որ համաներման արժանացած մարդկանց թվում եղել են ինչպես քաղաքական կուսակցությունների, հասարակական կազմակերպությունների ներկայացուցիչներ, այնպես էլ բլոգերներ և լրագրողներ:

«Այս քայլը հավանության է արժանի: Մենք հույս ենք հայտնում, որ, Ադրբեջանի միջազգային պարտավորվածությունների համաձայն, հետագայում նմանատիպ քայլեր կրկին տեղի կունենան»,- նշվում է հայտարարության մեջ, նաև ընդգծվում, որ Եվրամիության համար մարդու իրավունքները «փոխհարաբերությունների կարևորագույն տարրեր են»:

Հիշեցնենք, որ Ադրբեջանի նախագահ Իլհամ Ալիևը հրամանագիր էր ստորագրել ավելի քան 400 մարդու ազատ արձակման վերաբերյալ, այդ թվում` 14 արտասահմանցու  և ՌԴ 2 քաղաքացու: