Ադրբեջանական քարոզչամեքենայի հերթական սուտը

Իրանական «Azariha» կայքը բացահայտել է ադրբեջանական քարոզչամեքենայի հերթական կեղծիքը:

Օրերս, Ադրբեջանի դեսպանատան նախաձեռնությամբ, Խոջալուի դեպքերի կապակցությամբ Թեհրանում կազմակերպվել էր լուսանկարների ցուցահանդես, որի ընթացքում Հայոց ցեղասպանությանը վերաբերող  արխիվային հայտնի լուսանկար է ցուցադրվել:

Ըստ կայքի՝ Խուջալուի, այսպես կոչված, «ցեղասպանության» մասին վկայող լուսանկարն իրականում ԱՄՆ Կոնգրեսի գրադարանի արխիվային լուսանկարներից է, որում պատկերված է հայերի տեղահանումը դեպի Սիրիայի անապատներ:

Այս բացահայտումն անհարմար վիճակի մեջ է դրել Իրանում Ադրբեջանի դեսպան  Բունիադ Հուսեյնովին, որը ներկա է եղել ցուցահանդեսին:

«Թվում է, թե հարգարժան դեսպանը, անարգելով Իրանի ժողովրդին և կարծելով, թե իրանցիները ևս իրենց երկրի լսարանի պես պարզամիտ են, ուշադրություն չի դարձրել թեկուզ այն փաստին, որ Հալեպի չոր անապատները որեւէ առնչություն չունեն Խոջալուի կիսալեռնային, ցուրտ և ձյունապատ ձմռան հետ: Այսպիսով` նրանք անփութություն և թափթփվածություն են դրսևորում անգամ պատմությունը կեղծելու անշնորհակալ գործում»,- գրել է «Azariha» կայքը:

Տեղեկատվությունը «Yerkir.am»-ին տրամադրեց «Alikonline»-ը: