Տողատակի Միացեալ Նահանգներուն Ակնարկելով` Էրտողան. «Սուրիոյ Եւ Իրաքի Մէջ Թուրքիոյ Քայլերը Նեղութիւն Պատճառեցին Կեղտոտ Հաշիւներ Ունեցողներուն»

Թուրքիոյ նախագահ Ռեճեփ Թայիփ Էրտողան Տենիզլի նահանգին մէջ իր համակիրներուն առջեւ արտասանած խօսքին մէջ յայտնեց. «Թուրքիոյ` Սուրիոյ եւ Իրաքի վերաբերեալ կատարած քայլերը նեղութիւն պատճառեցին շրջանին նկատմամբ կեղտոտ հաշիւներ ունեցողներուն»:

«Անոնք, որոնք փորձեցին Թուրքիան վախցնել ահաբեկչական կազմակերպութիւններով եւ դրամանիշերու արժէքներով չյաջողեցան իրագործել իրենց նպատակը», նշեց ան:

«Այն ուժերը, որոնք տարիներու ընթացքին Թուրքիոյ հրամաններ կու տային ներկայիս իրենց նեղութիւնը կ՛արտայայտեն Անգարայի անկախ գործելուն նկատմամբ», ըսաւ Թուրքիոյ նախագահը:

«Անոնք, որոնք հովանաւորեալութեան ժամանակաշրջանին ժողովուրդին կամքը գրաւ դրին, եւ անոնք, որոնք իրենք զիրենք ժողովուրդէն վեր կը դասեն, այժմ նեղութիւն կը զգան թրքական պետութեան ուժգին կեցուածքէն», յայտնեց Էրտողան:

Ազդակ օրաթերթ