Փաշինյանի հայտարարությունից «տրոցկիզմի» հոտ է գալիս. Ռուբեն Մելիքյան

ՀՀ վարչապետ Նիկոլ Փաշինյանի՝ առանց դատարանի որոշման ունեցվածքի բռնագրավման մասին հայտարարությունից «տրոցկիզմի» հոտ է գալիս: Նման կարծիք РИА Новости-ի հետ զրույցում հայտնել է Հայաստանի արդարադատության նախկին փոխնախարար Ռուբեն Մելիքյանը:

Նախօրեին Ազգային ժողովում ելույթի ժամանակ  Նիկոլ Փաշինյանը հայտարարել էր, որ կառավարությունը դիտարկում է առանց մեղադրական դատավճռի ունեցվածքի բռնագրավման մեխանիզմները: Նրա խոսքով`  ՄԻԵԴ-ը դա նորմալ պրակտիկա է համարում կոռուպցիայի դեմ պայքարում և չի դիտարկում որպես մարդու իրավունքների սահմանափակում:

«Դրանից տրոցկիզմի հոտ է գալիս, տրոցկիզմը տրոցկիզմ է մնում, անգամ` եթե այն հայտարարվում է «թավշյա»,- ասել է Մելիքյանը:

Նրա խոսքով՝ շատ դժվար է պատկերացնել մի համակարգ, որը թույլ կտա ինչ-որ մարդկանց հարցեր առաջադրել Հայաստանի գրեթե բոլոր բնակիչներին:

«Ինչպիսի՞ն պետք է լինեն չափորոշիչները: Ո՞ր թվականից է դա սկսվում: Մենք քաղաքակիրթ ձևով գնում էինք եկամուտների և ունեցվածքի հայտարարագրման ճանապարհով, և դա նորմալ գործընթաց է ժողովրդավար պետությունների համար: Հիմա լինելու են ինչ-որ մարդիկ, որոնք որոշելու են՝ ում պահանջներ ներկայացնել, իսկ ում՝ ոչ: Կարելի՞ է, արդյոք, երաշխավորել, որ սա ինքնին չի դառնա կոռուպցիայի հզոր գործիք»,- նշել է Ռուբեն Մելիքյանը: