Ոտքի մատներն ենք գիպսով ֆիքսել. մանկատան պատուհանից ընկած երեխան լուրջ վնասվածքներ չի ստացել

Տեղեկացրել էինք, որ երեկ Մարի Իզմիրլյանի անվան մանկատանը տեղի է ունեցել պատահար:

ՀՀ աշխատանքի և սոցիալական հարցերի նախարարությունից տեղեկացնում են, որ մանկատանը խնամվող 11-ամյա Ա. Ն.-ն դաստիարակի ուղեկցությամբ գնացել է զուգարան: Ուղեկցող դաստիարակը սպասել է, որ երեխան դուրս գա, բայց երեխան բացել է պատուհանը և ճաղավանդակների արանքից ընկել ներքև:

Երեխան տեղափոխվել է «Սուրբ Աստվածամայր» ԲԿ, որի տնօրեն Նիկոլա Դալլաքյանը Yerkir.am-ի հետ զրույցում նշեց, որ երեխան սալջարդեր է ունեցել, լուրջ վնասվածքներ չի ստացել: «Մասնագետները զննել են, ոտքի մատներից երկուսը գիպսով անշարժացրել ու հետ ուղարկել մանկատուն»,- ասաց Դալլաքյանը:

Նշենք, որ Մարի Իզմիրլյանի անվան մանկատունն այժմ տնօրեն չունի. տնօրենի ժամանակավոր պաշտոնակատարն Արմինե Պետրոսյանն է: