Փաշինյանը մտադիր է Դավոսում ոչ պաշտոնական հանդիպում ունենալ Ալիևի հետ

Հայաստանի վարչապետ Նիկոլ Փաշինյանը հայտնել է, որ մտադիր է երեքշաբթի Դավոսում ոչ պաշտոնական հանդիպում ունենալ Ադրբեջանի նախագահ Ալիևի հետ:

«Այո, դա ոչ պաշտոնական հանդիպում է»,- ասել է Փաշինյանը` պատասխանելով «ՌԻԱ Նովոստի»-ի հարցին` արդյո՞ք կկայանա երկկողմ հանդիպում Հայաստանի ու Ադրբեջանի նախագահների միջև:

Ավելի վաղ, մամլո ասուլիսի ժամանակ, պատասխանելով հարցին, թե ե՞րբ կլինի հանդիպում Ադրբեջանի նախագահի հետ, Փաշինյանը պատասխանել է` «շատ շուտով»:

Իր հերթին Ալիևը Դավոսում հայտարարել է, որ Հայաստանի ու Ադրբեջանի ղեկավարների միջև երկկողմ հանդիպումներ դեռևս չեն եղել, սակայն արդեն եղել են մի քանի «կարևոր զրույցներ»: Այդ զրույցները կարևոր են եղել կողմերի դիրքորոշումը ֆիքսելու և  և ԼՂ հարցով բանակցությունները ակտիվացնելու առումով: Ալիևը ընդգծել է, որ երբեք չի խուսափել այդ հարցով հայկական կողմի հետ կոնտակտներից: