Գազի գնի փոփոխման ակնկալիքները «Գազպրոմ Արմենիա»-ում մեր ստուգումների հետ պետք չէ կապել. ՊԵԿ նախագահ

«Գազպրոմ Արմենիա»-ում ՊԵԿ-ի կողմից իրականացվող ստուգումներն այս պահին կասեցված են` որոշակի ճշգրտումներ անելու համար. լրագրողների հետ զրույցում հայտնեց ՊԵԿ նախագահ Դավիթ Անանյանը` անդրադառնալով դեռևս նոյեմբերին ՊԵԿ-ի կողմից «Գազպրոմ Արմենիա»-ում սկսված ստուգումներին:

Հիշեցնենք, որ ՊԵԿ-ը 2018-ի տարեվերջին «Գազպրոմ Արմենիա»-ում բացահայտել է խախտումներ և առանձնապես խոշոր չափերով հարկային պարտավորություններ չվճարելու դեպքեր: 

Անանյանը նշեց, որ ընկերությունում ընթացիկ բյուջեի հետ փոխհարաբերությունների ճշտության ստուգում է միայն տարվում: «Այնտեղ կա նաև որոշակի քննչական գործողություններ կատարելու անհրաժեշտություն: Սակայն գազի գնի փոփոխության ակնկալիքները մեր ընթացիկ հսկողության հետ որևէ կերպ պետք չէ կապել, քանի որ առաջին անգամ չէ, որ ՊԵԿ-ը ստուգումներ է անում: Ուղղակի թեման մի քիչ ավելի մեծ հանրային հնչեղություն է ստացել, որի կարիքը չկար»,- ասաց նա: