Մեկ մեքենայի մաքսային բեռը զգալիորեն նվազել է, որը ինվոյսային համակարգի ներդրման հետևանք է. ՊԵԿ նախագահ

Մեկ մեքենայի մաքսային բեռը զգալիորեն նվազել է, որը ինվոյսային համակարգի ներդրման հետևանք է: Այս մասին լրագրողների հետ հանդիպման ժամանակ ասաց ՊԵԿ նախագահ Դավիթ Անանյանը` անդրադառնալով ավտոմեքենաների մաքսազերծման գործընթացում տեղի ունեցած փոփոխություններին:

Անանյանը նշեց, որ այս տարեսկզբից ինվոյսային համակարգւը չի հանվել, ուղղակի նոր գործիք` հաշվիչ է ներդրվել:

«Մաքսազերծումը հետևյալ փուլերով է անցնում` անձը ներկայացնում է մեքենայի փաստաթղթերը, ինվոյսը հաշվիչի արժեքի հետ է համեմատվում, և եթե անարժանահավատության խնդիր չի առաջանում, մաքսային ձևակերպումն արվում է ինվոյսի հիման վրա: Դրանից հետո մենք պարզում ենք ինվոյսի հավաստիությունը, և եթե պարզվում է, որ այդ ինվոյսը չի եղել, կիրառվում են պատասխանատվության միջոցներ»,- ասաց Անանյանը:

Նա անդրադարձավ նաև երկու և ավելի ավտոմեքենաների վաճառքի հետ կապված  խնդիրներին` ասելով, որ ոլորտում առկա խնդիրների վերաբերյալ կառավարությունում տեղի ունեցած քննարկումների արդյունքում առանձնացվել է երկու տարբերակ, որոնցից որևէ մեկի ընդունման պարագայում լուծվում են առկա խնդիրը:  Անանյանը չմանրամասնեց այդ տարբերակները` նշելով, որ դրանք կներառվեն Հարկային օրենսդրության փոփոխությունների փաթեթում: