Եվրոպան հյուրընկալում և քողարկում է ահաբեկիչներին. Զարիֆը մեղադրել է ԵՄ-ին

Իրանի դեմ հնչեցրած մեղադրանքները Եվրոպային չեն ազատում պատասխանատվությունից՝ ահաբեկիչներին ապաստան տրամադրելու եւ նրանց քողարկելու համար: Ըստ ԻՌՆԱ գործակալության` այս մասին «Twitter»-ի իր միկրոբլոգում գրել է Իրանի ԱԳ նախարար Մոհամմադ Ջավադ Զարիֆը՝ մեկնաբանելով Իրանի անվտանգության նախարարության դեմ պատժամիջոցներ սահմանելու ԵՄ որոշումը:

«Եվրոպացիները, այդ թվում՝ Դանիան, Հոլանդիան եւ Ֆրանսիան, քողարկում են ահաբեկչական այն խմբավորմանը, որը 12 հազար իրանցու է սպանել եւ խրախուսել է Սադամ Հուսեյնի հանցագործություններն ընդդեմ Իրաքի քրդերի, ինչպես նաեւ այն ահաբեկիչներին, որոնք Եվրոպայից կազմակերպում են անմեղ իրանցիների սպանդը: Մեղադրանքներն Իրանի դեմ չեն ազատում ԵՄ-ին պատասխանատվությունից»,- գրել է Զարիֆը:

Հիշեցնենք, որ նախօրեին ԵՄ-ն համաձայնել է օրինականացնել Իրանի հատուկ ծառայությունների դեմ սահմանված պատժամիջոցները՝ իբր Եվրոպայի տարածքում սպանության նպատակով կազմակերպված գործողության պատճառով:

Հոլանդիայի իշխանություններն Իրանին մեղադրում են երկրի տարածքում իրանական ծագմամբ երկու քաղաքացու քաղաքական սպանության մեջ: Իսկ նախորդ տարվա նոյեմբերին Դանիան իր դեսպանին հետ էր կանչել Թեհրանից՝ իբր երկրում իրանական հատուկ ծառայությունների անօրինական գործունեության պատճառով: