Գաղտնալսվելու վախից թուրք նախարարները նախընտրում են խոսել WhatsApp-ով. Կարո Փայլան

Թուրքիայի քրդամետ Ժողովուրդների դեմոկրատական կուսակցության հայ պատգամավոր Կարո Փայլանը ուշագրավ հայտարարություն է հնչեցրել, թե գաղտնալսվելու վախ ունեցող բազմաթիվ թուրք նախարարներ նախընտրում են զանգահարել WhatsApp հավելվածի միջոցով. տեղեկացնում է T24-ը:

«Ես ականատես եմ եղել, որ բոլորը, այդ թվում՝ կուսակցության պատգամավորները, խոսում են WhatsApp-ով: Դե, թող հերքեն: Այդ նախընտրությունն ահա թե որտեղից է գալիս` չեն վստահում, մտածում են՝ մի ժամանակ գյուլենականներն էին գաղտնալսում, հետո` ուրիշները, հիմա ի՞նչ իմանաս, թե ով է լսում»,- ասել է Փայլանը:

Ուշագրավն այն է, որ խորհրդարանում իշխող կուսակցության անդամները չեն հակադարձել կամ չեն հերքել Փայլանին, անգամ` նրանցից մեկը համաձայնել է հայ պատգամավորի հետ: