Քոչարյանը Մարտի 1-ի գործով հրաժարվում է ցուցմունք տալ. Սասուն Խաչատրյան

Տեղեկացրել էինք, որ Մարտի 1-ի գործով նախկին քննչական խմբի ղեկավարն ու դատաձգաբան-փորձագետը ներգրավվել են գործում  որպես մեղադրյալներ` ապացույցներ կեղծելու համար:

Կառավարության նիստից հետո լրագրողները ՀՔԾ պետ Սասուն Խաչատրյանից հետաքրքրվեցին, թե արդյո՞ք երկրորդ նախագահ Ռոբերտ Քոչարյանին մեղսագրվող արարքների քանակն ավելացել է: Խաչատրյանը նշեց, որ երբ մեղադրյալին մեղսագրվող արարքների քանակն ավելանում է, որոշում է կայացվում առաջադրված մեղադրանքը լրացնելու, փոփոխելու մասին: «Սակայն այս պահին նման որոշում կայացված չէ: Հենց որոշենք, որ բավարար ապացույցներ կան՝  Քոչարյանի մեղադրանքը փոփոխելու, լրացնելու, այդ մասին կիմանաք»,- ասաց նա:

Հարցին` չե՞ն պատրաստվում հարցաքննել Ռոբերտ Քոչարյանին, որովհետև նա հայտարարում էր, որ բանակը ներգրավվածություն չի ունեցել, սակայն հիմա այլ ապացույցներ են ի հայտ եկել, Խաչատրյանը պատասխանեց, որ Քոչարյանն այս գործի շրջանակներում  հրաժարվում է ցուցմունք տալ, և դա նրա իրավունքն է: «Ոչ ոք չի կարող մեղադրյալին պարտադրել ցուցմունք տալ»,- ասաց ՀՔԾ պետը: