Ցավում եմ, որ միջազգային կազմակերպությունները երբեմն ցուցաբերում են միակողմանի մոտեցում. ՀՀ ՄԻՊ

Այսօր ՀՀ ՄԻՊ Արման Թաթոսյանը կառավարության նիստից հետո լրագրողների հետ զրույցում անդրադարձավ Արցախի ՄԻՊ-ի հրաժարականին:

Հիշեցնենք, որ Արցախի ՄԻՊ-ը երեկ ներկայացրել էր հրաժարականի դիմում:

Արման Թաթոսյանի խոսքով` Արցախի ՄԻՊ-ի ջանքերի շնորհիվ էր, որ նոր որակի վրա դրվեց իրավապաշտպան աշխատանքը` ցույց տալ, որ տարածքի քաղաքական կարգավիճակը չպետք է նշանակություն ունենա իրավունքների պաշտպանության համար:

«Արցախի ՄԻՊ-ի աշխատանքի շնորհիվ էր, որ մենք միջազգային ասպարեզում ունեցանք հանդիպումներ, ասուլիսներ, քննարկումներ: Արցախում մադու իրավունքների պաշտպանությունը առաջնային է, և ցավում եմ, որ միջազգային կազմակերպությունները երբեմն ցուցաբերում են միակողմանի մոտեցում և մարդու իրավունքների տեսանկյունից պատշաճ գնահատականի չեն արժանացնում այդ հարցերը»,- ասաց Արման Թաթոսյանը` հավելելով, որ ամեն ինչ պետք է անել, որ Արցախը, ժողովրդավարության տեսանկյունից, ճանաչելի դարձնենք աշխարհին: