«Չնչիկ» ֆիլմի հետ կապված խնդրի լուծումը Կինոկենտրոնի տիրույթում է. նախարար

Արամ Շահբազյանի «Չնչիկ» ֆիլմի հետ կապված զրուցել ենք ռեժիսորի հետ. հարցի լուծումն իրականում Կինոկենտրոնի տիրույթում է. պաշտոնավարման 100 օրն ամփոփելիս ասաց ՀՀ մշակույթի նախարար Լիլիթ Մակունցը:

Նախարարի խոսքով՝ իր համար անհասկանալի է, թե ինչու Կինոկենտրոնի տիրույթում գտնվող այդ հարցը տեղափոխվել է այն հանձնաժողովի դիտարկման դաշտ, որը պետք է քննարկեր այս տարի ֆինանսավորվող ֆիլմերի ցանկը:

«Պարոն Շահբազյանը մտահոգություն էր հայտնել, որ հնարավոր է՝ դարձյալ անաչառ որոշում չկատարվի և ֆիլմը կրկին չստանա ֆինանսավորում: Սակայն ես նրան տեղեկացրել եմ, որ որևէ հանձնաժողովի անաչառությունն ինձ համար սկզբունքային հարց է, չնայած ես բովանդակային առումով չեմ միջամտելու: Քանի դեռ հանձնաժողովի որոշում չկա, բնականաբար, գնահատական տալ չենք կարող: Սակայն ես կոչով նորից կդիմեմ հանձնաժողովին, որպեսզի ամեն ինչ արվի շատ թափանցիկ, որ որևէ մեկի մոտ տպավորությւոն չլինի, որ անարդար որոշում է կատարվել»,-ասաց նախարարը:

Հիշեցնենք, որ կինոռեժիսոր Արամ Շահբազյանը պգոստոսի 22-ին մշակույթի նախարարության շենքի առջև անժամկետ հացադուլ էր սկսել: Yerkir.am-ի հետ զրույցում ռեժիսորը նշել էր, որ պատճառն իր` արդեն ավելի քանի 10 տարի այդպես էլ ավարտին չհասցված «Չնչիկ» ֆիլմն է: