Ֆրանսիայում մեծ հանդիսությամբ բացվել է Սողոմոն Թեհլիրյանի հուշակոթողը

Ֆրանսիայի հայկական կազմակերպությունները համակարգող խորհրդի և Մարսելի 6-րդ ու 8-րդ շրջանների քաղաքապետարանի նախաձեռնությամբ` հունիսի 23-ին քաղաքի Սողոմոն Թեհլիրյանի անվան հրապարակում բացվել է հերոսի հուշակոթողը, որի հեղինակը Դավիթ Եուզանն է:

Հանդիսավոր արարողությանը ներկա են եղել Մարսելում Հայաստանի հյուպատես Ռուբեն Խարազյանը, 4-րդ եւ 5-րդ շրջանի քաղաքապետ Մարին Փուսթոլինոն, Շրջանային խորհուրդի նախագահի ներկայացուցիչը, քաղաքապետական խորհրդի անդամներ, հայկական համայնքի ներկայացուցիչներ և այլք:

Բացման և  ողջույնի խոսքով հանդես են եկել շրջանի քաղաքապետ Իվ Մորեն, Ֆրանսիայի հայկական կազմակերպությունները համակարգող խորհրդի հարավային շրջանի երիտասարդ նախագահ Օռելի Փրյունան: Նա իր խոսքում անդրադարձել է  Հայոց ցեղասպանությանը, Բեռլինի դատարանի` 1921-ի հունիսին Սողոմոն Թեհլիրյանին անմեղ հայտարարող վճռին: Խոսքի ավարտին բանախոսն անդրադարձել է նաև Հայոց ցեղասպանությունը ճանաչած երկրներին:

Հուշակոթողի բացման արարողությունց հետո հնչել են Ֆրանսիայի և Հայաստանի քայլերգներն ու հեղափոխական երգեր: