Արցախում նախագահի հաճախակի փոփոխությունն անիմաստ է. Արայիկ Հարությունյան

Բակո Սահակյանը Արցախի Սահմանադրության ու անվտանգության երաշխավորն է, և նախագահի հաճախակի փոփոխությունն անիմաստ է, մանավանդ, որ նրա լիազորությունների ժամկետը չի ավարտվել: Այս մասին այսօր լրագրողներին ասաց Արցախի պետական նախկին նախարար Արայիկ Հարությունյանը` պատասխանելով ԱՀ նախագահ Բակո Սահակյանի հնարավոր հրաժարականի վերաբերյալ հարցին:

Անդրադառնալով իր պաշտոնաթողությանը` նա նշեց. «Ես ուզում եմ լինել ավելի ազատ քաղաքական գործիչ, ինչը թույլ կտա հանրության կողմից պահանջված բարեփոխումներին ավելի մեծ մասնակցություն ունենալ»:

Հարցին` հնարավո՞ր է իր հրաժարականը պայմանավորված է 2020թ. Արցախում կայանալիք նախագահական ընտրություններին մասնակցությամբ, Արայիկ Հարությունյանը պատասխանեց. «Արցախում ամեն բան հնարավոր է 50 տոկոսով, որովհետև այստեղ ամեն պահի առաջնագծում հնարավոր են լուրջ փոփոխություններ, որոնք փոխում են մեր ամբողջ օրակարգը»: