Սիրում եմ քայլել. Փաշինյանը քայլելով է գնում Բաղրամյան 26

Այսօր` կառավարության նիստից հետո, վարչապետ Նիկոլ Փաշինյանը Հանրապետության հրապարակից քայլելով գնաց Բաղրամյան 26: Նրան ուղեկցում էին քաղաքացիներ, լրագրողներ:

Հարցին, թե ինչո՞ւ է քայլելով գնում, Փաշինյանը պատասխանեց. «Որովհետև սիրում եմ քայլել»:

Հարցին, թե ինչպե՞ս է վերաբերվում տարբեր սոցիալական խմբերի կողմից իրականացվող բողոքի ցույցերին, որոնց հետևում կարող են ինչ-ինչ քաղաքական ուժեր լինեն, մասնավորապես` ՀՀԿ-ն, նա պատասխանեց. «Եթե ՀՀ-ում դեռ կան քաղաքացիներ, ովքեր կարող են ուղղորդվել Հանրապետական կուսակցության կողմից, դա, ճիշտն ասած, անհասկանալի է»:

Ճանապարհին վարչապետին էին մոտենում քաղաքացիներ` տարեց կանայք ու երիտասարդներ, որոնք ցանկանում էին ողջագուրվել ու լուսանկարվել նրա հետ: Նրանց լուսանկարում էին վարչապետի թիկնազորի անդամները: Ճանապարհի մյուս կեսը նա մեքենայով անցավ:

Ի դեպ, վարչապետի ավտոշարասյան ընթացքի ժամանակ երթևեկությունը չդադարեցվեց: