«Ազիզյան, հեռացիր». լարված իրավիճակ՝ թիվ 11 դպրոցում. պահանջում են տնօրենի հրաժարականը

Երևանի Մոնթե Մելքոնյանի անվան թիվ 11 դպրոցում լարված իրավիճակ է: Դպրոցի ուսուցիչների մի մասը, աշակերտներն ու ծնողները պահանջում են դպրոցի տնօրեն Ռուզաննա Ազիզյանի հրաժարականը:

Նրանց պնդմամբ՝ Ազիզյանն իրենց թույլ չի տվել մասնակցել Նիկոլ Փաշինյանի ձեռնարկած բողոքի ակցիաներին, իսկ այն ուսուցիչներին, որոնք մասնակցել են, նրանց իսկ պնդմամբ, տնօրենը պատրաստվում է աշխատանքից ազատել:

Ազիզյանը լրագրողների հետ զրույցում հերքեց, որ արգելել է մասնակցել ցույցերին, բայց ուսուցիչները և ծնողները պնդում են, որ տարիներ առաջ էլ տնօրենն ընտրությունների ժամանակ ՀՀԿ-ի օգտին ձայների հավաքագրմամբ է զբաղվել: Դպրոցի բակում հավաքված աշակերտները վանկարկում են` «Ազիզյա'ն, հեռացի'ր»:

Այս պահին դպրոց են ժամանել ոստիկաններ:

Հիշեցնենք, որ Ռուզաննա Ազիզյանը Սերժ Սարգսյանի համակուրսեցին է: