Հայաստանում քաղաքական ճգնաժամի լուծման ուժային տարբերակն անթույլատրելի է. ՌԴ Դաշնային խորհրդի ներկայացուցիչ

Հայաստանում քաղաքական ճգնաժամի լուծման ուժային տարբերակը, որի կոչն արել է ընդդիմության առաջնորդ Նիկոլ Փաշինյանը, անթույլատրելի է և կասկածի տակ կդնի վարչապետի ընտրության լեգիտիմությունը, իսկ երկրին լուրջ հետևանքներ են սպասվում, այդ թվում` նաև արտաքին քաղաքական ոլորտում։  Այդ մասին РИА Новости-ին ասել է ՌԴ Դաշնային խորհրդի միջազգային հարցերով կոմիտեի փոխնախագահ Վլադիմիր Ջաբարովը։

«Չի կարելի նման կերպ գալ իշխանության, քանի որ հետո այդ վարչապետի լեգիտիմությունը կասկածներ կառաջացնի»,- ասել է նա։

«Իրադարձությունների նման զարգացումը հղի է Հայաստանի համար լուրջ հետևանքներով ինչպես երկրի ներսում, այնպես էլ արտաքին քաղաքականության ոլորտում: Երևանն ունի թշնամիներ, որոնք կարող են օգտվել այդ իրավիճակից»,- հավելել է սենատորը։ 

Ջաբարովը կողմերին բանակցությունների կոչ է արել և հույս հայտնել, որ արդյունքում կգերակայի ողջամտությունը։

Սենատորի կարծիքով՝ անհրաժեշտ է անհապաղ անցկացնել խորհրդարանական ընտրություններ և փոխել երկրի վարչապետի ընտրության կարգը, օրինակ՝ խորհրդարանական կոալիցիայի հիման վրա։