Սխալ է և սուբյեկտիվ. Թուրքիայի ԱԳՆ-ի արձագանքը՝ Ցեղասպանության մասին Թրամփի ուղերձին

Թուրքիայի ԱԳ նախարարությունը հայտարարություն է տարածել ԱՄՆ նախագահ Դոնալդ Թրամփի՝ Հայոց ցեղասպանության 103-րդ տարելիցի վերաբերյալ ուղերձի մասին:

Նախարարությունը «անընդունելի է» որակել այդ թվականի մասին «սխալ» և «սուբյեկտիվ» պատմական մեկնաբանությունները:

«Մենք ակնկալում ենք, որ ԱՄՆ վարչակազմն արդար մոտեցում կցուցաբերի օսմանյան բոլոր ժողովուրդների համար ցավալի այդ ժամանակահատվածի մասին իր հայտարարություններում»,- նշվել է հայտարարության մեջ:

ԱԳՆ-ն ցանկացել է Թրամփին հիշեցնել նաև «հայերի ապստամբությունների հետևանքով սպանվածների մասին»՝ հերթական անգամ կրկնելով «պատմական հանձնաժողով» հիմնելու և «պատմական արխիվները համատեղ ուսումնասիրելու» առաջարկությունը:

Նախարարությունը նաև մատնանշել է Էրդողանի ուղերձը, որը, նրանց բնորոշմամբ, եղել է «հայ-թուրքական բարեկամությանը համապատասխանող»:

«Մենք ձեզ խորհուրդ ենք տալիս ուշադրություն դարձնել օսմանյան հայերի թոռներին ուղղված՝ Էրդողանի ուղերձը: Այնուամենայնիվ, մենք կարծում ենք, որ ԱՄՆ նախագահի կողմից արված այս հայտարարությունը չի համապատասխանում միջազգային օրենքի նորմերին և իբրև թե Ցեղասպանության մասին պնդումների առաջ քաշումը խելամիտ քայլ չէ»,- ասվում է հայտարարության մեջ: