Տեղին էր, շատ գոհ ենք․ Թուրքիայի ԱԳՆ-ի արձագանքը՝ ԱՄՆ-ի կողմից Սիրիայի հրթիռակոծմանը

Թուրքիայի ԱԳ նախարարությունը գոհունակություն է հայտնել ԱՄՆ-ի, Բրիտանիայի և Ֆրանսիայի ուժերի կողմից Սիրիայի հրթիռակոծման կապակցությամբ։

Նախարարությունը պաշտոնական հայտարարություն է տարածել՝ նշելով, որ այդ գործողությունները եղել են «մարդկության խղճի թարգմանիչը»։ «Տեղին էր, մենք շատ գոհ ենք»,- մասնավորապես նշվել է հայտարարության մեջ։

Թուրքիայի ԱԳՆ-ի համաձայն՝ իրենց երկիրը մշտապես կողմ է եղել նմանատիպ հանցագործությունների դեմն առնելուն և համապատասխան պատիժ կիրառելուն, որոնց միջոցով, ըստ նրա, կկանխվի նմանատիպ հանցագործությունների կրկնությունը։ 

«Այդ շրջանակներում, միջազգային հանրության և հատկապես` ՄԱԿ-ի Անվտանգության խորհրդի անդամների համար անհրաժեշտ է համընդհանուր համաձայնությունների հասնել `ապահովելու քիմիական զենքի կիրառման պատժելիությունը»,- ասվում է ԱԳՆ-ի հայտարարության մեջ։