«Ռոսսելխոզնադզոր»-ը կասկածում է, որ Հայաստանը վերաարտահանում է թուրքական լոլիկ

ՌԴ «Ռոսսելխոզնադզոր»-ը  կասկածում է, որ Հայաստանը վերաարտահանում է թուրքական լոլիկ, ու ապրիլի 11-ից ստուգումներ կիրականացնի հայկական ձեռնարկություններում. հայտնում է Интерфакс-ը` ծառայությանը հղումով:

Տեղեկության համաձայն` Հայաստանից ռուսական շուկա լոլիկ է արտահանում հիմնականում 2 ընկերություն` «Սպայկա» ՍՊԸ-ն և «Գրինպրոդուկտ» ՍՊԸ-ն, որոնք ունեն ինչպես սեփական արտադրությունը, այնպես էլ լոլիկ են մթերում այլ արտադրողներից: Վերջին 6 օրում վերոնշյալ կազմակերպությունները ՌԴ են ներկրել գրեթե 2000 տոննա լոլիկ:

«Արտադրության ծավալների աճն ու դեպի ՌԴ առաքումների ինտենսիվությունը վկայում են  լոլիկների, այդ թվում` թուրքական ծագման, վերաարտահանման մասին»,- ասվում է հաղորդագրությունում:

Հարցը քննարկվել է ՀՀ գյուղնախարարության սննդի անվտանգության պետական ծառայության ղեկավարի տեղակալ Եղիշե Մարգարյանի հետ: «Ռոսսելխոզնադզոր»-ը հայկական կողմից տեղեկություններ է պահանջել երկրում լոլիկ արտադրողների մասին, ինչպես նաև 2018-ին աճեցման ծավալների և արտադրման վայրերի մասին: Եղիշե Մարգարյանը խոստացել է անհրաժեշտ տվյալները ներկայացնել ապրիլի 10-ին: